PANTUN NASIHAT MADURA

Duri ona’ kembangnga pote

Namun temmo e tabun dhaja

Adu na’ kana’ mara pagate

Nyareya elmo pabalangaja

                   Ka tenggina melleya jamo

                   Campor accem so bigi kapo

                   Bila ba’na la asango elmo

                   Odhi’ senneng ta’ gampang etepo

Ka pasar Kolla melleya tempe

Melle kardus saebu ropeyah

Ja’ coma sakola lulus SMP

Mayu’ lanjut sampe’ kuliah

                   Entar ka Kolla ajalan manjeng

                   Ngella serre kala’ kowana

                   Mon asakola ajar pabajeng

                   Mara kaneserre oreng towana

          Ka Malaysia melleya senter

Toju’ asela etagguk maleng

Na’kana’ sateya la padha penter

          Pamet sakola tape pas ngaleleng

                   Entar ka Banjar melle malate        

                   Ka budiyan main tek-keteggan

Mon esoro ajar ca’na la ngarte

                   Bila ujian pas pek-kepeggan

           

Ser-keseran Le’ obi manis

Jang-lajangan dhaunna nangka

Bula Ker-pekkeran sambi nanges

Jang-bajangan esanggu dika

 

Bungkana pelle ma' ekatere

Ngatere ranca'na daun nangka

Tadha' pole bula se epekkere

Paggun mekkere oca'na dika

 

Dha' bara' ka pasar assem

Agarintong mara buwana billa

Bila agella' pas sambi mesem

Arassa caltong atena bula

 

Settong dhuwa' tello' empa'

Malem sennin ka jaba'a

Mon ta' endha' duli ngoca'

Mon ekenning pas egiba'a

 

Ka Tarate lebat pajikaran

Mano' ngortok neng etemorra

Reng alake ja' lako atokaran

Ma’ Olle notok saomorra

 

Obu' pandha' male' katopa'

Obu' lanjang ser-keseran

Mon ta' endha' duli ngoca'

Olle ta' lanjang ka pamekkeran

 

Bula abit ta' ngenom kopi

Mon morongnga lencak dhaja

Bula abit pon ta’ apanggi

Mon kerrongnga tadha' padha

 

Dha' dhaja dha' lao'a

Mekol landhu' ngeppe' buku

Laju asomaja mon noro'a

Pokol ballu' dhante' onggu

 

Ka gunong ngala' nyarowan

Kope bella kabaddha'a

Ate bingung adhu ta' karowan

Nape bula se ekatamba'a